| |
 Zeregin zaila da hori bere lana aurkeztu nahi duen egile batentzat, lan hori hau bezalakoa bada, bereziki: tankera honetako lan batek berez aurkeztu behar duelako, bere dinamikatik, alegiazko solaskide ikusezin batzuekin sortu litekeen harreman eta erlaziotik bizi den hitz jaurtia delako. Baina, batez ere, zeregin hori are zailagoa da aurkezten den lan hori oraindik areago aberastu, osatu eta sakondu beharreko gogoeta, esperientzia, ohar, akta, lanerako eskema eta jardunerako gidoi sorta bat izanik. Hori guztiak bukatzeko batere dogmatismorik gabe formulatzen da, ibiltzen hasitako bidea marraztuz bezala agertzen den pentsaera/jardun baten tentsio eta kontraesan guztiekin. Horrenbestez, lan honek topalekua, kritikarako gunea, eztabaidarako espazioa izan nahi du eta ez formulazio finko eta erabatekoetarako gunea.
Nolanahi ere, kontraesana adierazteak, pentsaeraren egitura baten edo estilo baten antolaketaren zentzuaren legea adieraztearekin batera, ez du esan nahi jatorrien nortasuna eta orientazioan dauden aldeak aintzakotzat hartu behar ez direnik. Lan hau urtetan egindako ikerketa eta gogoeten, ira kurketa eta idazketen, borroka eta leialtasunen laburpena da. Lan baten eta ibilbide baten historia da. Eta historia horren berri ematean, ez dugu ahalegin teoriko bat egin bakarrik: korrontearen kontrako jarreretan eta baldintza politiko, ideologiko eta instituzional zailetan, hitz hori jardunean eta kontrastean gauzatu behar izan dugu. Ez dugu amore ematen zilegitasun-tituluen aurrean (ahalegina, dedikazioa, buru-belarri aritzea, zintzotasuna), baina, halere, ez zaigu beharrezkoa iruditzen guk inolako titulurik erakutsi behar dugunik. Pentsaera/jardun-ildo kritiko eta konprometitu batean aritzen gara, instituzioetan eta instituzio "ez" direnetan ere. Eta ziurtasun bat daukagu gaurko egunean: hau dela egon nahi eta behar dugun lekua.
José Luisek Epistemologiari buruz idatzitako teoriaren oinarrietako batzuk jasotzen dira ondorengo testuetan.
|
|
